|
20100731自由時報
咱臺灣抾稅真無公平，百姓無地走閃，一sian五釐都去予人oo出來。政府官員呣但欠錢會當免還利息，連母金嘛聽好叫別人出，講白賊佫無抾稅金。
白賊政府逐工搬「騙鬼司功」的「白賊戲」，佫痞戲gau拖棚兼三講四呣著。官做愈大，白賊功夫練愈好，「吞瀾落去，白賊起來」，面袂紅，氣袂喘，講徦若真的呢！
觀世人聲音的觀世音菩薩，「聞聲救苦」誠好！阿九政府講官員原也愛學，呣對！基本上，he是封建思想。民主社會的官員攏是人民選的、納稅金飼的，哪有講辛勞該當做的煞反倒轉來咧共頭家討人情？。
平常時仔高高在上兼激屎，拄著代誌激外外佫激面腔予汝看。火燒赫大、赫懸，聽著聲、看著影的官員都聽好目睭om咧講白賊話。點一支薰人講「二手煙」有毒，化工廠燒徦按爾會無毒、無敗害？騙鬼食牛肚湯！
犯勢，in可能是無鼻著味！來啊！來long-stay啊！來現場感受庶民的苦、疼佮無奈啊！無，咱若是mooh一桶烏油來去前日本總督府頭前的Ketagalan大路放火燒，看汝會有代誌否？
水鬼騙城隍，做官騙厝裡，做生理騙熟似。一指遮目，當作無看大山，騙人親像過渡船！無汝欲按怎？無奈何騙家己講，迄種人「白賊話講規擔，入地獄喙舌割一半」。有啥人知？啥人有看見？
官繼續做，騙繼續騙，可憐的臺灣人！敢講這就是臺灣人的悲哀？
註：一指〔tsit8-tsainn2〕。辛勞，雇員、伙計。無奈何，bo-ta-ua。
（作者鄭兆祥 為臺語教師）
| 
